Cando ispuntat su sole su manzanu,
imponentes, attentos bos mustrades,
ma cun sas pedras mudas non mi dades
segrettos remunidos in s'arcanu!

Nademi 'e cal'istirpe fit s'umanu
chi bos hat postu sas pedras in tundu
a car'a bentu, solos in su mundu,
superbos in cust'isula regnantes?

Forsis fit unu populu 'e zigantes
possessores de fortzas soberanas,
o fin sos deos ch'in oras lontanas
bos hat pesadu in custa terra mia?

Non l'isco e ischire cheria
nuraghes caros e non faeddades,
ma in limbazu 'ostru mi narades
chi sezis bois sos altares mios
tottu lanidos, però sempre 'ios
a bentos, sole, nies e biddia

ca non bos siddit tempos incostantes.