Cantade alleluia corale
cun sa 'ostra suave melodia
ca de paghe, amor' e allegria
est da chelu arrivadu su signale;

su vintichimbe 'e su mese de Nadale
est bennid' a sa terra su Messia
isperanzia nostra, lughe e ghia
salvesa de d'ogni essere mortale;

benin a l'adorare sos tres Rese
Gaspari, Baldassarre e Melchioro
cun s'omaggiu, li dana unu saludu;

umilmente si 'ettana a pese
e li donan incensu, mirra e oro
a s'infante Divinu isculzu e nudu.