In custos tempos
male fadados,
babbos e fizos
disocupados;

Totu chirchende
sos postos fissos ...
castas e criccas
pensan' pro issos;

Economistas
draconianos,
mancu su pane
lassan' in manos

Totu pienos
de malas trassas,
tares e imu
murtas e tassas;

Cara Sardigna
terr' 'e poetas,
incarrarzada
da' sas bullettas;

Iscentziados,
solones dotos,
a cara manna
pedin' sos votos;

Orijias surdas,
mentes ischidas,
fabbricas burdas
totu faddidas;

In pagos annos
semus restados,
sena tribagliu
indepidados;

Custa Europa
tant'invocada,
dinari gratis
no non nde dana.

Afustigados
non paret beru,
zente chi morit
de disisperu.

Su tertzu mundu
l'amus innoghe,
chie non contat
non tenet boghe.

E non bi podent
mancu sos santos,
bi penset Deus
pro tottugantos.


Gigi Piu di Magomadas (Febbraio/Frealzu 2014)