Benennidos in custa carrela

Puttumajore, parizzos annos faghet, comente atteras biddhas de Sardigna, tenìada unu cuncordu.

In sos logos nostros no fid diffizzile agattare omines chi si ponian a cantare in custa manera, bastàit chi essèren' tentu appena de orija pro su cantu.

In biddha nostra bi fin pegas pessones chi cantàin "a cuncordu" sa Missa, sa Chida Santa e atteras funziones religiosas.

In Puttumajore, cun su passare 'e su tempus, s'est perdida s'usanzia proite, meda probbabbile, sos jovanos chircàin de cantare cantidos pius modernos, no pensendhe chi perdian una ricchesa manna. Atteras biddhas han tentu sa fortuna de sighire sas usanzias issoro.

In su 2010, in su mese de Maltu, su Cuncordu Planu de murtas, tenindhe s'intentzione se sighire cuddha moda chi bi fid in Puttumajore, hat incomintzadu a istudiare e cantare comente sos antigos.

Su pius de sas boltas sos cuncordos naschìan in sas Cunfrarìas, ca devìan cantare in sas chejas, ma non fid una regula, diffàttis bi fin puru cuncordos chi non fini cumpostos dae cunfrades, ma sighìana su matessi sas funziones religiosas comente sos atteros.

Su Cuncordu Planu de murtas non faghet parte de sa Cunfrarìa de Santa Rughe (s'unica Cunfrarìa de omines de Puttumajore) ma cantada in sas chejas in momentos comente sas Missas, Chida Santa, e atteras funziones.

Sos primos cantidos chi su Cuncordu hat istudiadu sunu sos cantidos de sa Missa ( Sa Missa a Cuncordu ) sos cantidos de Chida Santa ( S'Incravamentu e S'Iscravamentu ), sa Via Crucis ( Su caminu de sa Rughe ), iscritta dae Antoni Maria Pinna de Puttumajore, e sos cantidos de Nadale.

Comente sos atteros cuncordos, nois puru cantamos in sos palcos de sas festas, sempre sighinde su traju e sas usanzias de sos logos nostros, cun cantones de sa tradizione sacra e profana.