Andades volontarios a bolu
da chie passat oras dolorosas,
dende dae sas benas generosas
istiddios de vida e de consolu.

E solidales dades cun amore
sambene de colore universale,
no ischides a chie ne a cale
ratza non bos importat nen colore.

Sezis s'ipiju de su bonu coro
frisca frina de generosidade,
c'azis de chie sufrit piedade
asseliades sas penas insoro.

A meda zente salvades sa vida ...
cun su sambene 'ostru pretziosu,
bos paghet Deus, cun salude e gosu
e carighet sa 'ostra anima nida.




Seconda versione - luglio 2014


Volontarios sezis! C'azis dolu
de chie passat oras dolorosas,
dades, dae sas benas generosas,
istiddios de vida e de consolu.

E solidales dades cun amore
sambene de colore universale,
non bos importat a chie nen cale
ne bos importat ratza nen colore.

Sezis s'ipiju de su bonu coro
frisca frina de generosidade,
anghelos de umana piedade
asseliades sas penas insoro.

Est meighina de 'ogni ferida
su sambene chi dades pretziosu,
bos paghet Deus, cun salude e gosu
e carighet sa 'ostra anima nida,
... donadores de sambene e de vida.