Sa primma Rughe
Gesusu est cundennadu a morte
T'han cundennadu a sa morte
In s'ingiustu tribunale,
ca fis lughe universale,
troppu 'onu e pro custu
t'hana dadu ca fis giustu
tanta dura malasorte.

Sa secunda Rughe
Gesusu est garrigadu de sa Rughe
T'han sa Rughe garrigadu,
pesu grae subra 'e palas
e sas puntas pius malas
han retzidu sa carena
in sa Tua andanta lena
de ispinas coronadu!

Sa terza Rughe
Gesusu ruet pro sa primma 'olta
A pesa-rue l'has giutta
Sa Rughe a car'a su monte,
in s'ora chi da sa fronte
falat samben e suore:
isfattu da su dolore
has dadu sa primma rutta!

Sa quarta Rughe
Gesusu intoppat sa mama
In s'andera piedosa
has intoppadu a Maria,
ch'in sa tanta tribulia
non s'est cuada e fuida:
passu-passu l'hat sighida
cuss'iscena dolorosa!

Sa quinta Rughe
Gesusu est azuadu da su Cireneu
Cando tristu imbol' imbola
t'hat bidu in cuss'istradone
sa Rughe Tua, Simone,
si l'acchidat piedosu:
in su caminu affannosu
non ti lassat a sa sola.

Sa sesta Rughe
Veronica asciuttat sa cara 'e Gesusu
In su passare t'hat bidu
isfiguradu in su chizu
e cun diligu manizu
Veronica a manos giuntas
sas feridas las hat untas
e t'hat su samben frobidu.

Sa settima Rughe
Gesusu ruet pro sa segunda 'olta
Inoghe, in custa frimmada,
su Cristos torrat a ruer
cun sa cara in su piuer
sutta su pesu 'e sa Rughe ...
turmentu chi brottat lughe
pro d-ogn'anima dannada!

S'ottava Rughe
Gesusu intoppat sas feminas de Gerusalemme
Inoghe, Feminas pias,
lu pianghen de persè:
"Non pianghedas pro me,
pro fizos bostros versade
sas lacrimas e pregade
s'accansu 'e sas grascias mias"!

Sa 'e noe Rughes
Gesusu ruet pro sa tertza 'olta
Inoghe, sa tertza rutta
la faghet in mala sorte:
su piuer de sa morte
si l'est postu pro cabitta
e sa Rughe beneitta
lu turmentat postu sutta!

Sa 'e deghe Rughes
Gesusu fattu nudu 'e sas bestes
Inoghe, sas bestes Suas,
si las partin sena impudu,
lassendelu tristu e nudu
in sas aspritzas turmentas,
bettende in sas bestimentas
sas sortes malas e cruas!

Sa 'e undighi Rughes
Gesusu postu in sa Rughe
Milla! Sa tappa funesta:
subra sa Rughe l'assentan:
a l'incravare s'appentan
in sas manos e in pes,
de giaos l'han postu tres,
a su toccu 'e s'ora sesta.

Sa 'e doighi Rughes
Gesusu ispirat in sa Rughe
A sa pesada 'e sa Rughe
Si faghet notte sa die:
"O Babbu, l'intrego a Tie como s'ispiritu meu!
E sa volontad''e Deu siat fatta" gridat forte.
Ispirat ... e cun sa morte
Nos salvat ... e nos dat lughe!

Sa 'e treighi Rughes
Gesusu iscravadu da sa Rughe
Cumintzat s'iscravamentu
tra succuttos de dolore,
e Maria cun amore
attittat su fizu sou
in custu sepulcru nou
chi l'han fattu pro assentu!

Sa 'e battoldighi Rughes
Gesusu in su sepolcru, primariu 'e sos risortos
Da custu situ tombale
Cristos, biu, torrat fora!
Una lughe incantadora
L'imboligat sa carena:
unghentu pro d-ogni pena,
meighina a d-ogni male.





Su caminu 'e sa Rughe (VIA CRUCIS) resa in limba sarda da-e su poeta Puttumajoresu Antoni Maria Pinna